2 Peter 1
1Yo siule omi Yesu Keliso againe wavetumagana-ma kalivai-mina, BanaꞋe yada Yaubada kadu ada Tokibababala. Iya Saimoni-Fita Yesu againe gaveꞋagetoga kadu yana kabu gavaina be gaveꞋafositolo-ma yami leta gaꞋetoladina be wanaꞋitana. Bana Yesu Keliso yada Yaubada kadu ada Tokibababala kaliva tunutunugina faꞋina yada vetumagana giveleda omiꞋiyao be meda imeꞋeyao ada leleleya Bana matane.2Nuwadoga kadu aseniwalova Yaubada kadu yada Kaiwabu Yesu Keliso adi halamana againe hiveꞋinuba. Nuwanuwaku Badi wanahalamanedi-yo yadi nuwadoga kadu yadi aseniwalova ana ayauna againe wanatutuveguvegulami. a
Yaubada giluwafada tu ide yana nuwanuwa agaidiya
adafaiweya kadahawahegeda.
3Keke gavana faꞋina tu Yesu Keliso yana kova faꞋina ganaluꞋageyemi be higa yana nuwanuwa amine wanahuluhuluva. Yesu BanaꞋe gikovada-ma ana halamana againe faiwala kavaina be yana nuwanuwa amine adafaiweya kanadewadewa. E, yana kaiwabu kadu yana nuwanuwa hagihagina agaideya giꞋivemogatalini-yo BanaꞋe nuwada giꞋabina, ada gifaiwalaveleveleda-yo gavadi gavadi gilubodada be yana nuwanuwa amine kanamiyami, medema giveleda. 4Kadu mena yana nuwadoga againe yana veluga agaideya giwonadabedabena be higa nuwanuwa itaꞋitaluvadigadi adafaiweya kanavekwaulaugedi, nuwanuwai-dina faꞋidiya gaitoma moyaꞋaina babiya hikoyokoyo. E, yana wonadabadaba faꞋidiya nuwanuwa koyodi amifaiweya waꞋosedi be Tauna yana nuwanuwa givelemi-yo ami itaꞋita au vaita Bana ana itaꞋita amine wavaina. Mena yana wonadabadaba fifiwala-moꞋedi agaideya keke kanawona!5Tu Yaubada medemi gikivetoyogida kadu yana wonadabadaba ada veluga faꞋina giveleda faꞋina, wanavegavegala yami waꞋidibumuhiga. Yesu Keliso againe ahe wavetumagana. Au huluva yamumu-moꞋena yami vetumagana buye wanaveꞋatutamoꞋaina. Kadu Yaubada yana nuwanuwa ana halamana yami huluva yamumuna buye wanaveꞋatutamoꞋaina. 6Kadu taumiyao yami nuwanuwa ana hawata Yaubada yana nuwanuwa ana halamana buye wanaveꞋatutamoꞋaina. Kadu atuvefaꞋila taumiyao yami nuwanuwa ana hawata buye wanaveꞋatutamoꞋaina. Kadu Yaubada ana veꞋamohimohina atuvefaꞋila buye wanaveꞋatutamoꞋaina. 7Kadu Yaubada ana veꞋamohimohina tobohiyamiyao adi nuwakabubu buye wanaveꞋatutamoꞋaina. Kadu tobohiyamiyao adi nuwakabubu againe wanatutuveguvegulami-yo badi faꞋidiya wanahawahege-moꞋemi. 8KaꞋi mena dewa tulina tulina againe wanatutuveguvegulami, au yada Kaiwabu Yesu Keliso ana halamana againe wanafifaiwala. E, yami vetumagana ana ita keke vaita guwana keke. Au waguwami wanamiyami. 9Tu gava kaliva mena dewai-dina keke gidaseyemaunedi, medema Yaubada yana nuwanuwa faꞋina matana lowolowogina be nuwana giꞋuyuyuna, kadu yana koyona moyaꞋaina boi gifaisewadi tu Yesu Keliso gikolahegedi ma nuwana giulu.
10Tu tobohiyakweyao, ahe wahalamanena Yaubada giluwafami kadu gikovami be yana yoꞋogaga wanamiyami. Hidedemi gikovaluwafami faꞋina, gilubodami be yami vegala moyaꞋaina agaidiya yana lauwafa au velemoꞋena ma wanaseyemaunena. KaꞋi hidedemi wanahuluhuluva, au keke-moꞋa wananuwayewa kadu Yaubada ginahawahegemi be abaluku kikaiwabuna ginayauni-yo Yesu Keliso yana abavehimeya miyamiya-vagahina againe wanaluku, BanaꞋe yada Kaiwabu kadu ada Tokibababala amanadi. b , c
Afositolo yadi hawavemogatala Yesu Keliso faꞋine
au velemoꞋena.
12Tu omi nuwanuwai-dina galukahihiyedi-ma ahe wahalamanena kadu nuwanuwa velemoꞋena agaimiya giꞋela-ma wakidonena. Omi halamanimiyao nonogana tova moyaꞋaina nuwami ganatalafolefolena. 13Iya gahalamanena tova kabisona hida babi ganahegena yada Kaiwabu Yesu Keliso agaikuya gihawavemogatalena amine. Gilubodaku be aimo babi ana wowoya vaita vada amine gamimiyami ana toveya, mena nuwanuwai-dina faꞋidiya nuwami gadatalafolefolena. 15Medema faꞋina yaku waꞋidibumuhiga eda ganakidewedewena be aimo ahe gananuyabuyabumi-yo nuwanuwai-dina faꞋidiya tova moyaꞋaina anafaiweya nuwami ginaꞋaꞋafolefolena.16Tu boi ime afositolo yada Kaiwabu Yesu Keliso yana faiwala kadu yana yewaꞋela faꞋina agaimiya alumamala ana toveya, keke adagahe-kawowo vaita mali kaliva yadi kahikahihi veꞋalololo faꞋina hilukahihiyena-ma adayakahini. Au ime taumeyao matameya Yesu yana kaiwabu aꞋita-moꞋena. 17Boi ime Yesu buye oya mahamahalina againe alaka ada buye amiyami tu auheꞋama-nadi Yaubada Tamada Yesu gikivekaiwabuna kadu ana egana gikivelakahina. Mahalina veꞋakinamanamalina gihobu-yo Bana Tokaiwabu-moꞋa agona Yesu againe gilakayemu gigayo, “Hida NatuꞋaseꞋaseku. BanaꞋe nuwaku gikiveyamumu-moꞋena.” Mena agonai-nadi lobameya gilakayemu-ma ime taumeyao anogalina. d
Falofita yadi awatalatalaina Yesu Keliso faꞋine
au velemoꞋena.
19Boi tuwai-moꞋena Yaubada bonana ana toꞋawatalatalaina Keliso faꞋine higaheye-vagahina. Ime taumeyao Yesu Keliso aꞋitana faꞋina, ahalamanena toꞋawatalatalaina yadi gahe au velemoꞋena. Au gilubodami be yadi venuwaꞋata wanavenogalena faꞋina medema vaita mahalina uyuyu againe gimahamahala. E, tova moyaꞋaina yadi venuwaꞋata againe nuwami ginanauna be wananunauwena tu mala ginawedala be malatutulova ginalaka amine, Keliso yana yewaꞋela ana toveya nuwamiya ginavemalatutulova. 20Tu nuwanuwa saꞋeyana wanahalamane-hagihagiyena, higa Yaubada bonana ana toꞋawatalatalaina yadi venuwaꞋata keke taudiyao nuwadiya gidaveꞋinuba. Au AluꞋaluwa Mahalina giyuvetunetunedi amine Yaubada bonana hiꞋawatalatalainena. Medema faꞋina keke tamo hakwadi falofita yana venuwaꞋata Veyao Tuwaina ana bukiya gidadauda-ma tauna anafaiweya gihawavetuvetununi, tu AluꞋaluwa Mahalina yana kivetuvetunu againe anafaiweya gihalamanena. e
Copyright information for
VIV